మూడు ఫ్రాక్చ‌ర్స్ అయినా పోరాడాడు.. చాహ‌ల్ గాయాల‌పై గ‌ర్ల్‌ఫ్రెండ్ ఆర్జే మహ్వశ్‌

ఇండియన్ ప్రీమియర్ లీగ్ (ఐపీఎల్) 2025 సీజన్‌లో పంజాబ్ కింగ్స్ (పీబీకేఎస్) జట్టు ఫైనల్ వరకు సాగించిన ప్రయాణంలో ఆ జట్టు స్పిన్ సంచలనం యజువేంద్ర చాహల్ చూపిన అసాధారణ ధైర్యం, పోరాట పటిమ వెలుగులోకి వచ్చింది. ఐపీఎల్ చరిత్రలోనే అత్యంత ఖరీదైన స్పిన్నర్‌గా రూ.18 కోట్లకు పంజాబ్ జట్టుకు ఎంపికైన చాహల్, తీవ్ర గాయాలతో బాధపడుతున్నప్పటికీ జట్టు కోసం ఆడిన తీరు అందరినీ విస్మయానికి గురిచేస్తోంది.

గాయాలతోనే అద్భుత ప్రదర్శన
ఈ సీజన్‌లో చాహల్ 13 ఇన్నింగ్స్‌లలో 16 వికెట్లు పడగొట్టి సత్తాచాటాడు. ఇందులో రెండుసార్లు నాలుగు వికెట్ల ప్రదర్శన కూడా ఉంది. అయితే, లీగ్ దశ చివరి అంకంలో చేతి వేలి గాయం కారణంగా కొన్ని మ్యాచ్‌లకు దూరమయ్యాడు. మే 18న రాజస్థాన్ రాయల్స్ (ఆర్ఆర్‌)తో మ్యాచ్ ఆడిన తర్వాత, జూన్ 1న ముంబై ఇండియన్స్ (ఎంఐ)తో జరిగిన కీలకమైన క్వాలిఫయర్-2 మ్యాచ్‌తో పాటు ఫైనల్లోనూ బరిలోకి దిగాడు.

అయితే, ఈ ప్రయాణం వెనుక చాహల్ అనుభవించిన నొప్పి గురించి తాజాగా అత‌ని గ‌ర్ల్‌ఫ్రెండ్‌, రేడియో జాకీ (ఆర్జే) మహ్వశ్‌ సంచలన విషయాలు వెల్లడించారు. "చాలా మందికి తెలియని విషయం ఏమిటంటే.. చాహల్ రెండో మ్యాచ్ ఆడుతున్నప్పుడే పక్కటెముకలు విరిగాయి. ఆ తర్వాత బౌలింగ్ వేలు కూడా ఫ్రాక్చర్ అయింది. ఇలా మూడు ఫ్రాక్చర్లతోనే ఈ సీజన్ మొత్తం ఆడాడు" అని మహ్వశ్‌ తన ఇన్‌స్టాగ్రామ్ పోస్టులో పేర్కొన్నారు. "అతను నొప్పితో బాధపడటం, అరవడం మనమందరం చూశాం. కానీ ఎప్పుడూ వెనకడుగు వేయలేదు! ఎంతటి యోధుడి స్ఫూర్తి నీది చాహల్?" అంటూ ఆమె ప్రశంసించారు.

ఫైనల్లో పోరాడి ఓడిన పంజాబ్
11 ఏళ్ల తర్వాత పంజాబ్ కింగ్స్ ఫైనల్‌కు చేరడంలో చాహల్ పాత్ర ఎంతో కీలకం. రాయల్ ఛాలెంజర్స్ బెంగళూరు (ఆర్‌సీబీ)తో జరిగిన ఫైనల్ మ్యాచ్‌లో పంజాబ్ కింగ్స్ పోరాడి ఓడింది. కేవ‌లం ఆరు ప‌రుగుల తేడాతో ఓట‌మి చ‌విచూసింది. ప‌రాజ‌యం పాలైనప్పటికీ, చాహల్ వంటి ఆటగాళ్లు చూపిన ధైర్యసాహసాలు ఈ సీజన్‌లో పంజాబ్ ప్రస్థానాన్ని చిరస్మరణీయం చేశాయి. వచ్చే సీజన్ కోసం జట్టు సన్నద్ధమవుతున్న వేళ, చాహల్ యోధుడి స్ఫూర్తి ఆటగాళ్లు తమ జట్ల కోసం, క్రీడ కోసం చేసే త్యాగాలకు నిదర్శనంగా నిలుస్తుంది.